CCLXXXIX.

1396, Januar 11. Frankenstein.

Derselbe verreicht dem Stifte das von Peter von Kunzendorf erkanfte Dorf Paulwitz.

In gotis namen amen. Wyr Steffan Poduska von koniclichir gewalt der kronen czu Behemen hauptman czu Frankinsteyn bekennen in desym keyginwortegen briffe alle den, dy en an seyn, horen adir leysen, daz vor unsir keyginwortekeyt komen ist der erwir knecht Petir von Cunczendorff mit gesundem lybe, mit wolbedochtem mute, mit gutem rate syner frunde vnd unbetwngen vnd hat bekant, das her vorkaufft habe recht vnd redelichin daz dorff Pauwilwicz gancz vnd gar mit allem rechte, mit aller herschafft nichtis vsgenomen, wy is sy sundirlichen genant adir geheysyn, alzo is von aldirs yn synen reynen vnd greyniczen ist gelegen, dem erwirdegen herren in gote vatir, herren Johannes von Bresslaw, apt czu Camencz vnd der ganczen samenunge dez egenanten clostirs Camencz vnd allen eren nochkomelingen; daz hat der egenante Petir von Cunczendorff daz vorgenante gut Pauilwicz mit aller syner czugehorunge, nichtis vzgegenomen, alz vorgeschreben stet, vor vns willeclichen offgelozen. Dez habe wir angeseyn er beger vnd beyte vnd haben daz genomen yn vnser hende von koniclicher macht vnd gewalt, der wir bruchende syn in Franki(n)steynischem wychbilde, vnd haben daz egenante dorff Pauwelwicz, gelegen in Franki(n)steynischem wychbilde, mit allen rechten vnd hereschafften, nichtis vzgenomen, is sy benand adir nicht benant, alzo vorgeschreben stet, gereicht vnd gelegen dem obgenanten herren, herren Johannes apte czu Camencz vnd der ganczen samenunge doselbysten, do mete czu tuen vnd czu lossyn noch eren willen, wy is se allirbequeymeliste dunket syn. Desyr rede czu eyme gedechnisse vnd geczugnisse habe wir desyn briff lossyn vorsygelen mit koniglichem ingesegil, daz do gehorit czu der hauptmanschafft, czu erben vnd czu sachen yn dem wichbilde czu Frankinsten. Dez synt geczug dy edelen vnd erbern: Heynrich von der Rybenicz, Herman von Rychinbach, Hannus Petirswalde, Cunrad vom Nymancz, Nickil von Ronaw, Augustinus vom Bawmgarte vnd Caspar vnser schriber, dem wir dese sachen bevolen han. Gegeben czu Frankinsteyn am neysten dinstage noch dem Obirsten tage noch Crist gebort tusunt drihundirt iar vnd yn dem sechsten vnd nunczegisten iare.

Or. Perg. S. wie an voriger Urkunde. Frömrich S. 87.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.